ජල රකුසාගෙන් රට බේරාගන්න පෙරට ගිය
නාවික නිලධාරීන් 5 දෙනාට සිදුවූ ඛේදවාචකය
එක් නිලධාරියකුගේ සිරුර හමු වේ
December 6, 2025
අමිල මලවිසූරිය
දිට්වා සුළි කුණාටුව මෙරටට කඩාවැදුණු ඉකුත් 27 දා සිටම ගංවතුරෙන් ජීවිත බේරාගැනීම, නායයෑම්වලින් කොටු වූ පිරිස් ගලවාගැනීම ආදි බොහෝ මානුෂීය කටයුතු වෙනුවෙන් ශ්රී ලංකා නාවික හමුදාවද කැප වී සිටියේ දිවා රෑ නොබලමිනි. එහිදී ඉකුත් 28 දා පෙරවරුවේ අනුරාධපුර පුත්තලම මාර්ගයේ කලාඔය පාලම ආසන්නයේදී මහා ජලකඳට හසු වූ බසයේ සිටි 69 දෙනා බේරාගැනීමට නාවික හමුදාව ඉටු කළ මෙහෙය අතිමහත්ය. මුලින්ම ඒ බසයේ වහල මත සිටි 68 දෙනා නාවික හමුදා කුඩා බෝට්ටුවක් මඟින් අසල වෙළෙඳසලක වහලක් මතට ගෙන ගොස් තිබුණේ වරකට තිදෙනා බැගින් අසීරු මෙහෙයුමකිනි.
එලෙස සුළි කුණාටුව මෙරට තුළ සක්රියව පැවති ඉකුත් 27, 28, 29 යන තෙදින ඉන් පීඩාවට පත්ව අසරණව සිටි ජනයාගේ දිවි ගලවාගැනීමට මහත් සේ කැපව සිටියදී නාවික හමුදාව දෙසින්ද ඛේදනීය පුවතක් සැල විය. ඒ, 28 දා සවස චලෙයි මෝය කට පුළුල් කරමින් සිටියදී නාවික හමුදා නිලධාරීන් පස්දෙනකු අතුරුදන් වීමක් සම්බන්ධයෙනි.
එදින අධික වර්ෂාව හේතුවෙන් මුළු උතුරු පළාතටම පාහේ ගංවතුර තත්ත්වය දැඩිව බලපා තිබිණි. ඒ අතර මුලතිව් චලෙයි කලපුවේ මෝය කට වැලි පරවලින් වැසීයෑමේ තර්ජනයකට මුහුණ දෙමින් පැවතිණි. ඒ හේතුවෙන් චලෙයි කලපුව ආශ්රිත ජනයාට මෙන්ම ධීවරයන්ගේ බෝට්ටුවලටද හානි වන තත්ත්වයක් එළඹ තිබිණි. මේ අතර, චලෙයි කලපුවට යාබදව තිබූ චලෙයි නාවික හමුදා අනුඛණ්ඩයද ජලයෙන් යට වීමේ තර්ජනයකට මුහුණ දී සිටියේය. එය ඒ වන විට එම ප්රදේශයේ සහන කටයුතු දියත් කරමින් සිටි නාවික හමුදා නිලධාරීන්ට මහත් ගැටලුකාරි තත්ත්වයක් උදා කළේය. කෙසේ වෙතත් මේ පීඩා අතරතුරම නාවික හමුදා කණ්ඩායමක් 28 දා පෙරවරුවේ චලෙයි කලපුවේ වැලි පර ඉවත් කරමින් මෝය කට පළල් කිරීමක යෙදුණේ නවීන උපකරණ භාවිත කරමිනි.
එලෙස පෙරවරුවේ කලපුවේ වැලි පර ඉවත් කර මෝය කට පුළුල් කළද, අධික වර්ෂාපතනය නිසා කලපුවේ ජල ධාරිතාව නැවතත් ඉහළ යමින් තිබිණි. එබැවින් එදින සවස් යාමයේද පස් දෙනකුගෙන් සමන්විත නාවික හමුදා කණ්ඩායමක් අධික ගංවතුර තත්ත්වයද නොතකා නැවත කලපුවට පිවිස මෝය කට පළල් කරන්නට විය. එලෙස අධික වර්ෂාව මධ්යයේම වැලි ඉවත් කරමින්, ජල පහරට කඩිනමින් මුහුදට ගලා යෑමට සලසමින් සිටි නාවික හමුදා නිලධාරි කණ්ඩායම සහ චලෙයි නාවික හමුදා කඳවුර අතර පණිවිඩ හුවමාරුව එක්වරම ඇනහිටියේය. ඒ වන විට රාත්රියද එළඹ තිබිණි. සබඳතාව නතර වීමත් සමඟ කඳවුරේ සෙසු නිලධාරීන් පැමිණ තම සගයන් ගැන සෝදිසි කර බැලුවද ඔවුන් ගැන කිසිදු තොරතුරක් සොයාගත නොහැකි විය. අනතුරුව ඔවුන් සොයා නාවික හමුදාව සහ යුද හමුදා විශේෂ කණ්ඩායමක්ද එදින රාත්රිය පුරා සෝදිසි කළද කිසිදු ප්රතිඵලයක් නොවිණි.
මෙහිදී අවාසනාවන්ත ලෙස අතුරුදන් වී ඇත්තේ හංවැල්ලේ පදිංචිව සිටි නාවික උප ලුතිනන් අවිෂ්ක ඩිල්ෂාන් වෑවිට, වැලිමඩ පදිංචි නායක නැවි ක්රිෂාන් ධනංජය, මාතලේ, නාවුල පදිංචි නායක නැවි චතුරංග වික්රමරත්න, අලුත්ගම, කළුවාමෝදර පදිංචි නායක නැවි රෝෂන් ෂානක සහ දඹුල්ල, පැල්වෙහෙර පදිංචි නායක විදුලි කාර්මික ධනංජය කෝලිත මධුෂංක දිසානායකය.
එලෙස පස්දෙනා අතුරුදන් වීමත් සමඟ නාවික හමුදා මාධ්ය ප්රකාශක කමාන්ඩර් බුද්ධික සම්පත් සඳහන් කළේ එම පිරිස සොයා අන්තර්ජාතික සහය මෙන්ම නවීන තාක්ෂණයද යොදාගනිමින් අඛණ්ඩ මෙහෙයුම් සිදු කරන බවයි.
කෙසේ හෝ ඉකුත් පළමු වැනිදා එක් නාවික නිලධාරියකුගේ සිරුරක් චලෙයි කලපුවේ සිට කිලෝමීටර් පහක පමණ දුරකින් යුත් පුදුමාතලන් වෙරළ තීරයේ තිබී හමු විය. ඒ අනුව නාවික හමුදාව එම අතුරුදන් පස්දෙනාගේ ඥාතින් දැනුවත්කොට වෙරළේ තිබූ සිරුර හඳුනා ගැනීමත් සමඟ එය අතුරුදන්ව සිටි නායක විදුලි කාර්මික (LL 100748) ධනංජය කෝලිත දිසානායකගේ බව ඔහුගේ ඥාතිහු ඉකුත් 3 වැනිදා මුලතිව්, මාංචෝල රෝහලේදී හඳුනා ගත්හ. ධනංජය කෝලිතගේ අවසන් කටයුතු ඉකුත් බ්රහස්පතින්දා දින ඔහුගේ ගම් ප්රදේශය වූ දඹුල්ල, පැල්වෙහෙරේදී සිදු කෙරුණේ දහසක් දෙනාගේ සෝසුසුම් මධ්යයේය.
සෙසු නාවික නිලධාරින්ගේ සිරුරු ද සොයමින් වැඩිදුරටත් අඛණ්ඩ මෙහෙයුම් සිදු කෙරෙන බව නාවික හමුදාව සඳහන් කරයි. “මචං මම උඹලගේ ගෙවල් පැත්ත බලන් ආවේ… බය වෙන්න දෙයක් නෑ… මොනාහරි ප්රශ්නයක් තිබ්බොත් කියන්න…” යි පවසමින් වින්ග් කමාන්ඩර් නිර්මාල් සියඹලාපිටිය සිය මිතුරකුට යැවූ අවසන් ‘වොයිස්’ පණිවිඩය, ඒ මිතුරා සමාජ මාධ්යයේ පළ කර තිබිණි. එම මිතුරා වැඩිදුරටත් සටහන් කරන්නේ නිර්මාල් අවසන් මොහොතේත් අසරණ වුණු සිය ගමේම මිනිසුන්ට කෑමට ගෙන ආ පාර්සල් බිමට දා එම ස්ථානයේ සිටි මිනිසුන්ට හානියක් නොවන්නට වග බලාගෙන අවසන් ගමන් ගිය සැබෑ මානව හිතවාදි ගුවන් නියමුවකු ලෙස ශ්රී ලාංකේය විරු නාමාවලියට සිය නමද එක් කරමින් දිවි පූජා කළ බවයි.
ගුවන් හමුදා සාමාජිකයෝ ගුවනින් ගොස් දිට්වා සුළි කුණාටුවට කොටු වූවන් මුදාගැනීමට මෙන්ම අත්යවශ්ය ආහාර ද්රව්ය ලබාදීමට ඉටු කළ මෙහෙය සුළුපටු නොවේ. එලෙස ගුවන් හමුදා හෙලිකොප්ටර් බළගණය ක්රියාත්මක වීමෙන් ඉමහත් කාර්යභාරයක් සිදු කරද්දී වින්ග් කමාන්ඩර් නිර්මාල් සියඹලාපිටිය ද එම ගුවන් හමුදා විරුවන් අතර ප්රමුඛ කාර්යභාරයක් කරමින් සිටි නිලධාරියෙකි.
ඔහුගේ බිරිය බුද්ධිකා ලක්මිණි ගුණරත්න: “මහත්තයා, අවසන් වතාවට ගෙදර ඉඳලා රත්මලාන ගුවන් කඳවුරට රාජකාරියට ගියේ 27 වැනිදා. එයා එදාම මට කතා කරලා කිව්වා ‘දැන් පුත්තලම, පාලවිය පැත්තේ ආපදාවට ලක් වූ අයට සහන සලසනවා කියලා. ඒ මිනිස්සු හරිම අසරණ වෙලා ඉන්නේ. එයාලට අපි ඉන්නකල් පුළුවන් විදිහට උදවු කරන්න ඕනෑ. හරිම කනගාටුදායක තත්ත්වයක් තමයි තියෙන්නේ’ කිව්වා. දුරකතන අවහිරතා නිසා ඉන් පසුව අපට කතා කරන්න බැරි වුණා. ඔය අනතුර වුණු දා රාත්රී 7ට විතර මට ගුවන් හමුදා කඳවුරෙන් කෝල් එකක් ආවා මගේ මහත්තයා නැති වුණා කියලා. මට අදහගන්නවත් බැරිව ගියා…” යැයි ඇය හැඬූ කඳුළින් පැවසුවාය.
වින්ග් කමාන්ඩර් නිර්මාල්ට සිය දිවි ගමන අවසන් කරන්නට වූයේ ‘දිට්වා’ සුළි කුණාටුවෙන් කොටු වූ වෙන්නප්පුව, මාරවිල ඇතුළු පෙදෙස්වල ජනතාවට අත්යවශ්ය ආහාර ද්රව්ය ලබාදීමට ඉකුත් 30 වැනිදා පස්වරුවේ කටුනායකින් ගුවන්ගත වූ බෙල් 212 හෙලිකොප්ටර් යානයේ ප්රධාන ගුවන් නියමුවා ලෙස කටයුතු කරමින් සිටියදීය. එහිදී යානයේ ඇති වූ කාර්මික දෝෂයක් හේතුවෙන් එදින පස්වරු 6ට පමණ යානය මාරවිල, ලුණුවිල පාලම අසලදී ගිං ඔයට හදිසි ගොඩබෑමකට යෑමේදී සිදු වූ අනතුරින් ඔහුට සිය ජීවිතයෙන් සමුගන්නට වූයේ හදවත් කම්පා කරවමිනි.
යානය අනතුරට පත්වෙද්දී එහි නිර්මාල් සමඟ සහය ගුවන් නියමු පියාසර ලුතිනන් එරංග චාමර ඒකනායක, ගුවන් අවිකරු කෝපල් දිනිඳු චාමර ජයවර්ධන, ගුවන් ඡායාරූප ශිල්පි අචිර ඉමාෂ සහ තවත් නිලධාරියෙක් ගමන් කර තිබිණි. ඔවුන් ගුවන්ගත වී තිබුණේ මාරවිල ප්රදේශයේ ගංවතුරට කොටු වූවන්ට අත්යවශ්ය ආහාර පාර්සල් ලබාදීමටය. එහෙත් යානයේ හදිසි කාර්මික දෝෂය නිසා එය සිදු කරගත නොහැකි වීමත් සමඟ ලුණුවිල පාලම අසලට යානය අඩි 75ක පමණ උසක් දක්වා පහත් කර පාලම මත සිටි පිරිසට ආහාර පාර්සල් කීපයක් හෙළා, ගංවතුරෙන් පිටාර ගලමින් තිබූ ගිං ඔය දෙසට ගමන් කොට හදිසි ගොඩබෑමට සූදානම් වෙද්දී අනතුරට මුහුණ දී තිබිණි. ඒ මොහොතේ පාලම මත සහ මාර්ගයේ සිටි පිරිසක් අනාරක්ෂිත ලෙස හැසිරෙමින් ගුවන් යානය වීඩියෝගත කර තිබිණි. ඒ අනුව යානය අනතුරට පත් වූ සැණින් සමාජ මාධ්යවලද ප්රචාරය විය.
ගිං ඔයේ පිටාර ගැලූ ජලය සහිත ප්රදේශයට වැටුණු පස්දෙනා ප්රදේශවාසීන්ගේ සහයෙන් කඩිනමින් මාරවිල මූලික රෝහලට ඇතුළත් කෙරුණද වින්ග් කමාන්ඩර් නිර්මාල්ට ජීවිතයෙන් වන්දි ගෙවන්නට සිදු විය.
වින්ග් කමාන්ඩර් නිර්මාල්ගේ මරණය පිළිබඳ ඉකුත් 1දා මීගමුව රෝහලේ ප්රධාන විශේෂඥ අධිකරණ වෛද්ය නිලධාරි ඩබ්ලිව්.ඒ.එස්.ආර්. වික්රමආරච්චි සිදු කළ පශ්චාත් මරණ පරීක්ෂණයෙන් හෙළි වී තිබුණේ එය දියේ ගිලී හුස්ම හිර වීමෙන් සිදු වූ මරණයක් බවයි. ඊට අමතරව තදබල තෙරපීමකින් ඉළඇට කීපයක් කැඩී ඇති අතර, බාහිර තුවාල කිසිවක් පෙන්නුම් නොකරන බවත් පශ්චාත් මරණ පරීක්ෂණයෙන් තහවුරු විය.
යානය අනතුරට පත් වීමට පෙර සිටම එය වීඩියෝගත කළ අයගේ වීඩියෝ දසුන් සමාජ මාධ්යයන්හි එසැණින් සැරිසරන්නට විය. ඒ ඔස්සේ ඇතැමුන් චෝදනා කළේ යානය එම පාලම මතට හෝ මාර්ගයේ ගොඩබෑමට තිබූ අවස්ථාව එම ස්ථානයේ වීඩියෝගත කරමින් සිටි පුද්ගලයන් නිසා වැළකී ගිය බවටයි. එහෙත් ගොඩබිමට එම යානය හදිසි ගොඩබෑමක් සිදු වූයේ නම් ගිනිගෙන සියලු ජීවිත විනාශ වීමට හැකියාවක් තිබූ බව ඒ පිළිබඳ විශේෂඥයන්ගේ මතයයි.
මේ අනතුර සම්බන්ධයෙන් ගුවන් හමුදාපතිවරයා මාධ්යයට කීවේ, “මං මේ අනතුරට ලක් වූ යානයේ සිටි අනෙක් ගුවන් නියමුවා සමඟ කතා කළා. ඔහු කැප්ටන් කෙනෙක්. අත්දැකීම් සහිත නිලධාරියෙක්. ගුවන් යානාවල ‘රොට ආර්පීඑම්’ කියලා දෙයක් තියෙනවා. ඇත්තටම දිවි ගලවාගත් නියමුවා කියන විදිහට ‘රොට ආර්පීඑම්, එක එක්වරම 60 වෙන කල් අඩු වෙලා තියෙනවා. එතකොට උඩ ඉන්න බෑ. එහෙම ‘රොට ආර්පීඑම්’ එක අඩුවෙන්න ක්රම කීපයක්ම තියෙනවා. දැන්ම අපට කියන්න බෑ ඒක අඩු වුණේ මොකක් නිසාද කියලා. එක පරීක්ෂණයක් කරලා හොයාගත යුතුයි. ඒ විදිහට ‘රොට ආර්පීඑම්’ අඩු වුණ නිසා තමයි ‘ඉමර්ජන්සි ලෑන්ඩින්’ එකකට ගිහින් තියෙන්නේ. ප්රධාන ගුවන් නියමුවා උත්සාහ කරලා තියෙන්නේ වතුරට ලෑන්ඩ් කරන්නයි. ඒ වෙලාවේ මිනිස්සු මාර්ගයේ හිටියේ. ගුවන් යානයේ සිටි අය අතින් සංඥා කරමින් කියනවා පේනවා අයින් වෙන්න කියලා. බැරි වෙලාවත් යානය මාර්ගයට වැටුණා නම් ලොකු පිරිසකට අනතුරක් වෙන්න තිබුණා. යානය ඒ ප්රදේශයට ගියේ මලුවල දාලා කෑම පැකට් 150ක් පමණ දෙන්න. ඒ කෑම පැකට් දීලා ආපහු දකුණට හරවලා යන්න හදද්දි තමයි ‘රොට ආර්පීඑම්’ අඩු වෙලා තියෙන්නේ. එහෙමම මීටර් 50ක් විතර යානය වතුරේ ගිහින් තියෙනවා. ක්ෂණයෙන් ‘ආර්පීඑම්’ එක වැඩි වන ශබ්දයත් වීඩියෝවලින් ඇහෙනවා. අපට දැනට පෙනෙන්න තියෙන්නේ යානයේ ඇතිවූ තාක්ෂණික ප්රශ්නයක් තමයි අනතුරට බලපෑ හේතුව…” යැයි ගුවන් හමුදාපතිවරයා පැවසීය.
අනතුර පිළිබඳව සහය ගුවන් නියමුවාද සමාජ මාධ්යයේ සඳහන් කර තිබූ සටහනක මෙලෙසද විය: “කැප්ටන් නිර්මාල් යානය ඇතුළේ හිටපු අපේ අයගේ ජීවිත බේරගන්නට තමයි එයාගේ පැත්තට යානය ඇල කරලා ලෑන්ඩින් එක කළේ. ඒකෙන් තමයි එයා නැති වුණේ. ඔහු එවෙලෙත් කිව්වේ, ‘මිනිස්සු දැන් වින්ද දුක ඇති. තවත් මිනිස්සුන්ට දුක් දෙන්න ඕනෑ නැහැ. උඹලව මං බේරගන්නම්. උඹලා හයියෙන් අල්ලගනින්’ කියලා. තමන්ගේ ජීවිතය ගැනවත් හිතන්නේ නැතිව යානය එයා ඉන්න පැත්තට ක්රෑෂ් වෙන්න ඉඩ ඇරියා. ඔහු එකෙන්ම පොරක්. ආපහු ඔහු වගේ අය මේ රටට බිහිවෙන්නේ නැහැ…” යනුවෙන් ඉතාම සංවේදි සටහනක් එම ගුවන් නියමුවා තබා තිබිණි.
වෙන්නප්පුව පොලීසියේ විමර්ශන නිලධාරින් ඉදිරියේ ප්රකාශයක් ලබාදුන් යානයේ සහායක ගුවන් නියමු ලුතිනන් චාමර ඒකනායක: “ගංවතුරට කොටු වී සිටි විශාල ප්රමාණයක් අපි බේරගත්තා. ලුණුවිල ප්රදේශයේදී යානයේ හදිසි කාර්මික දෝෂයක් ඇති වුණා. යානය කඩාවැටීමත් සමඟ ප්රධාන නියමු සියඹලාපිටියගේ ජීවිතය නැති වුණා. වතුරේ අඩි 20ක් විතර යටට යානය ගිලී තිබුණා. මම ෂීට් බෙල්ට් එක ගලවගෙන යානයෙන් පිටතට පැමිණියා. අනෙත් තිදෙනාත් උඩට ඇවිත් හිටියා. හැහැයි වින්ග් කමාන්ඩර් සියඹලාපිටිය මහත්තයා හිටියේ නෑ. මමයි කෝපල් ජයවර්ධනයි කිමිදිලා යානය ඇතුළේ සිර වී සිටි සියඹලාපිටිය මහත්මයගේ ෂීට් බෙල්ට් එක ගලවලා ඔහු ඉවතට ගත්තා. ඒ වෙලාවේ ඔහුට සිහිය තිබුණේ නෑ. ඊට පස්සේ ප්රදේශයේ තරුණයන්ගේ සහායෙන් වතුරට ලෑලි දාලා, කඹ දාලා නිවෙසක උඩ තට්ටුවට ඔහුව ගත්තා.” යැයි ඔහු පැවසීය.
2024 වසරේදී වින්ග් කමාන්ඩර් ධුරයට පත්ව ඇති නිර්මාල් මියයෑමෙන් පසු ගෘෘප් කපිතාන් ධුරයට උසස් කෙරිණි.
සියඹලාපිටිය ආරච්චිගේ අසංක සජිත් නිර්මාල් සියඹලාපිටිය 1984 වසරේ පෙබරවාරි 22 දා උපන්නෙකි. ඔහුගේ උපන් ගමද අනතුර වූ වෙන්නප්පුවේම කිරිමැටියාන, තුලාවලය. නිර්මාල්ට සහෝදර සහෝදරියන් දෙදෙනෙකි. වැඩිමල් සොහොයුරිය ගුවන් සේවිකාවකි. බාල සොහොයුරා ඔස්ට්රේලියාවේ පදිංචිව සිටී. ඔහුගේ මව විමලා වීරසිංහ විශ්රාමික රාජ්ය බැංකු නිලධාරිනියකි. වෙන්නප්පුව ජෝෂප් වාස් විද්යාලයෙන් අධ්යාපනය හැදැරීමෙන් පසු ඔහුගේ සිහිනයක් වූ ගුවන් නියමුවකු වීමේ අභිලාෂය සපල කරගනිමින් 2005 වසරේ ජූලි හය වැනිදා ගුවන් හමුදාවට එක් වී තිබුණේ උසස් පෙළ ජීව විද්යා අංශයෙන් අධ්යාපනය ලැබීමෙන් පසුවය. අනතුරුව මෙරටදී මෙන්ම එක්සත් අරාබි එමීර් රාජ්යය, බංග්ලාදේශයේ බෙල් 412 EPහි සිමියුලේටර් පුහුණුව, ඉන්දියාවේ වනාන්තර සහ හිම මත දිවි ගලවාගැනීමේ පාඨමාලාව සහ එක්සත් ජනපදයේ සිනර්ජි ආර්කි බහුපාර්ශ්වික විෂය කරුණු විශේෂඥ හුවමාරුවටද එක් වූ අයෙකි.
දකුණු සුඩානයේ එක්සත් ජාතීන්ගේ සාම සාධක මෙහෙයුමටද එක්ව ඇති ගෘෘප් කපිතාන් නිර්මාල් නැඟෙනහිර මානුෂීය පදක්කම, උතුරු මානුෂීය පදක්කම, විදේශ සේවා පදක්කම එක්සත් ජාතීන්ගේ දකුණු සුඩාන පදක්කම යන සම්මාන ද දිනාගෙන තිබේ. වසර විස්සක ගුවන් හමුදා දිවිය තුළදී VVIP කපිතාන්වරයකු සහ මාස්ටර් ග්රීන් ශ්රේණිගත නියමුවකු ලෙස සේවය කර ඇති අතර බෙල් 412, බෙල් 212, MI 17 සහ ජෙට් රෙන්ජර් ගුවන් යානා මඟින් පියාසර පැය තුන්දහසකට වඩා ගමන්කර ඇති ගෘෘප් කපිතාන් නිර්මාල් පළපුරුදු නියමුවන් කීපදෙනා අතරින් ඉදිරියෙන්ම සිටි ගුවන් නියමුවෙකි.
දිට්වා සුළි කුණාටුවෙන් පීඩා විඳි ජීවිත ගලවාගැනීම ඇතුළු ඒ වෙනුවෙන් ගුවන් හමුදාව දියත් කළ මෙහෙයුම්වලදී ද ඉමහත් කාර්යභාරයක් කළ 41 හැවිරිදි නිර්මාල් හත් හැවිරිදි කුඩා පුතෙකුගේ පියෙකි. කොළඹ විශ්වවිද්යාලයේ අන්තර්ජාතික සබඳතා පිළිබඳ උපාධිධරයකු ද විය. ඊට අමතරව ඔහු ලන්ඩන් මෙට්රොපොලිටන් විශ්වවිද්යාලයට ද ඇතුළුව විද්යාව පිළිබඳ ශාස්ත්රපති උපාධිය හදාරනු ලැබුවේ Aviation/ Airway Management and Operation යන අංශවලිනි. අනතුරුව ඔහු එම සරසවියේම MSc උපාධියද සම්පූර්ණ කර තිබුණේ රාජකාරියට මෙන්ම අධ්යාපනයට ද මනා සේ කැප වෙමිනි. නිර්මාල් අධ්යයනය කළ කොළඹ විශ්වවිද්යාලයේ ශාස්ත්රපති උපාධි ප්රදානෝත්සවය ඉකුත් 2වැනිදාට යෙදී තිබිණි. ඒ වන විට ඔහු මෙලොවින් සමුගෙන ගොස් සිටි හෙයින් කොළඹ විශ්විද්යාලයේ උපකුලපති මහචාර්ය ඉන්දික කරුණාතිලක විසින් නිර්මාල්ට හිමිව තිබූ ශාස්ත්රපති උපාධි සහතිකය සහ රතු ලෝගුව ඔහුගේ දේහය මත තැන්පත් කිරීම සිදු විය. ඒ මොහොතේ උපකුලපතිවිරයා සඳහන් කළේ ගෘෘප් කපිතන් නිර්මාල් රට වෙනුවෙන් කරන ලද සේවය වෙනුවෙන් කරන ගෞරවයක් ලෙස එවැනි ක්රියාවක් කළ බවත් එවැනි උපාධි ප්රදානයක් සිදු වූයේ තමන් දන්නා ඉතිහාසය තුළ ප්රථම වරට බවයි.
සිය බිරිය සහ කොළඹ රාජකීය විද්යාලයේ ප්රාථමික අංශයේ ඉගෙනුම ලබන කුඩා පුතු සමඟ රත්මලානේ පදිංචිව සිටි ගෘෘප් කපිතාන් නිර්මාල් සියඹලාපිටිය පසුගිය 4 වැනිදා රට, ජාතිය වෙනුවෙන් අමිල මෙහෙවරක් ඉටු කරමින් පසු සමු ගෙන ගියේ ඉතිහාසයට එක් වූ ගුවන් නියමුවකු ලෙස සදා නොමැකෙන නාමයක් සලකුණු කරමිනි.(Silumina Features )
