සියලු රථ වාහනවලට ‘මාර්ග යෝග්‍යතා සහතිකය’ අනිවාර්ය වෙයි
By Anura Balasooriya -නොවැම්බර් 8, 2025
සියලු ම රථ වාහන සඳහා ඉදිරියේදී ‘මාර්ග යෝග්‍යතා සහතිකයක්’ ලබා ගැනීම අනිවාර්ය කිරීමට කටයුතු කරගෙන යන බව මෝටර් රථ ප්‍රවාහන කොමසාරිස් ජනරාල් කමල් අමරසිංහ ‘මව්බිම’ට පැවසීය.
ජාත්‍යන්තර වශයෙන් පිළිගත් සහතිකයක් වන මෙය, ලොව දියුණු රටවල අනිවාර්ය සහතිකයක් බව ත් එම සහතිකය නොමැති වාහනයක් ධාවනයට ඉඩක් නොලැබෙන බව ත් ඔහු සඳහන් කළේ ය.
දැනට වාණිජ කටයුතුවල යෙදෙන වාහන සඳහා ලබාගත යුතු ‘යෝග්‍යතා සහතිකය’ සියලු ම වාහන සඳහා අනිවාර්ය කර සියලු වාහන සඳහා දැනට ලබාගත යුතු දුම් සහතිකයත් සමග යෝග්‍යතා සහතිකය ද ඒකාබද්ධ කර මෙම ‘මාර්ග යෝග්‍යතා සහතිකය’ එක ම ස්ථානයකින් නිකුත් කිරීමට බලාපොරොත්තු වන බව ද ඔහු කීය.
මෙය ඉතා සංකීර්ණ පුළුල් වැඩසටහනක් වන අතර එය මැනවින් අධ්‍යයනය කොට කළ යුතු කාර්යයක් බැවින් ලබන වසරේ සිට එහි මූලික කටයුතු ආරම්භ කිරීමට පියවර ගන්නා බව ද කොමසාරිස් ජනරාල්වරයා සඳහන් කළේ ය.
දැනට ක්‍රියාත්මක වන ‘දුම් සහතික’ නිකුත් කිරීමේ ක්‍රමවේදය 2027 දෙසැම්බර් 31 වන දා දක්වා ක්‍රියාත්මක විය යුතු බැවින් නව ක්‍රමවේදය තවත් වසර දෙකකින් එනම් 2028 වසරේ සිට හඳුන්වා දීමට සැලසුම් කර ඇත.(MAWBIMA LK NEWS)