රට-දැය-සමය වෙනුවෙන් සිය දිවි කැප කළ ආචාර්ය හරිස්චන්ද්‍ර විජයතුංග මහතාණෙනි ඔබට සුබ ගමන්
රට-දැය-සමය වෙනුවෙන් සිය දිවි කැප කළ ආචාර්ය හරිස්චන්ද්‍ර විජයතුංග හෙළයන් වෙනුවෙන් හඬක් නැගු යුග පුරුෂයෙක් විය .එවන් ජාතිකභිමානය පෙරදැරි කර ගෙන හඬක් නගන්නට අප දිවයිනේ පහලවූ අවසන් වියතා ඔහු යයි මට සිතේ.ඔහු අතිශය දුර්ලභ ගණයේ බුද්ධිමතෙකි.ඔහු අපරටේ පහලවූ දැයට හදපත්ලෙන්ම ආදරය කළ අවංක භුමි පුත්‍රයෙකි.සිංහලයේ මහ සම්මත භූමි පුත්‍ර පක්ෂයේ නිර්මාතෘ වූ ආචාර්ය හරිශ්චන්ද්‍ර විජයතුංග මහතා ඊයේ (13දා) තම දිවිසැරිය නිම කරනවිට ඔහු 94 වැනි වියේ පසු විය.ක්‍ෂේත්‍ර රැසක සිය හැකියාව පැතිරූ මෙම කෘතහස්ත දේශපාලකයා ජිවන චරිතයෙන් අපට ලද හැකි ආදර්ශය ප්‍රසංෂනිය එකකි.
ඔහු ගත් කතුවරයෙකු, පරිවර්තකයෙකු, ප්‍රකට ශබ්දකෝෂ සම්පාදකවරයෙකු, ගුරුවරයෙකු, අධිනීතිඥයෙකු මෙන්ම ප්‍රතිපත්තිගරුක දේශපාලනඥයෙකු විය.
මෙම කෙශ්ත්‍රයකම ඔහු ඉටු කර ඇත්තේ විශිෂ්ඨ සේවාවකි.
හරිශ්චන්ද්‍ර විජයතුංග 1931 ඔක්තෝබර් 25 වන දා මිනුවන්ගොඩ ප්‍රදේශයේ මැඩෑමුල්ල ගමෙහි උපත ලබා තිබුණි. ඔහුගේ පියා දේශීය අක්ෂි වෛද්‍යවරයකු වූ ඩබ්ලිව්. එම්. ඩී. බී. විජයතුංග අතර මව අමරාවතී ජයසිංහ වූවා ය. දූ දරුවන් අට දෙනෙකුගෙන් යුතු වූ පවුලේ හතරවැන්නා වුයේ හරිශ්චන්ද්‍ර විජයතුංගය.
දෙවන ලෝක යුද්ධ සමයේ ආරක්ෂක පියවරක් ලෙස කොළඹ පැවති පාසල් කොළඹින් පිටතට ගෙන යාම නිසා කොළඹ නාලන්දා විද්‍යාලය මිනුවන්ගොඩට ගෙන විත් තිබුණි .මිනුවන්ගොඩ ආණ්ඩුවේ ද්වී භාෂා පාඨශාලාවෙහි ශාස්ත්‍රෝද්ග්‍රහණය කරමින් සිටි හරිශ්චන්ද්‍ර සිසුවා මිනුවන්ගොඩ නාලන්දා විද්‍යාලයට ඇතුළත් කිරීමට දෙමව්පියෝ කටයුතු කර තිබුනේය. යුද්ධය අවසන් වීමෙන් පසුව කොළඹ නාලන්දා විද්‍යාලයට ඇතුළත් වූ ඔහු එහි දී විශ්ව විද්‍යාල ප්‍රවේශ විභාගය සමත් වී 1952 දී කොළඹ විශ්ව විද්‍යාලයට ඇතුළත් විය. 1955 දී බී. ඇස්. සී. විද්‍යාවේදී උපාධිය ලැබගැනීමට ඔහු සමත් විය.
ආරම්භක සභාපති ලෝක අක්ෂි දාන සංගමය දේශබන්දු වෛද්‍ය හඩ්සන් සිල්වා, කරුණාරත්න අබේසේකර, හිටපු දේශිය වෛද්‍ය ඇමති ගෞරවණීය (වෛද්‍ය) ධර්මසේන ආටිගල, හිටපු වැවිලි ඇමති ගෞරවණීය රුපා කරුණාතිලක, ප්‍රවීන චිත්‍රපට නළු සහ වේදිකා නළු, ආචාර්ය හෙන්රි ජයසේන, හිටපු ලංකාවේ ප්‍රවීණ ක්‍රිකට් ක්‍රීඩක ස්ටැන්ලි ජයසිංහ, වෛද්‍ය ගුණදාස අමරසේකර හරිශ්චන්ද්‍ර විජයතුංගයන්ගේ නොළඹ නාලන්දා විද්‍යාලයයේ සමකාලීනයන වූහ.
ඔහු 1964 දී එකල පේරාදෙණිය විශ්ව විද්‍යාලයයේ අධ්‍යාපනය ලබමින් සිටි කරුණා පෙරේරා මෙනෙවිය සමඟ විවාහ විය. ඈ වර්ෂ 2000 දී අභාවප්‍රාප්ත වූ අතර එම දෙපළට පුතුන් තුන්දෙනෙකු හා එක් දියණියක් සිටිති.
විජයතුංග මුදලිගේ හරිශ්චන්ද්‍ර විජයතුංග ඔහුගේ සම්පුර්ණ නම විය. සිංහලයේ මහසම්මත භූමිපුත්‍ර පක්ෂයේ නායක ධුරය ඉසිලු අතර 1994 සහ 1999 යන වර්ෂවල පැවති ජනාධිපතිවරණ දෙකේ දී එම පක්ෂයේ අපේක්ෂකයා වශයෙන් ඔහු ඉදිරිපත් විය.
වර්ෂ 2005 දී එළි දක්වන ලද පිටු 2000 ක ට අධික ප්‍රමාණයකින් යුක්ත ගුණසේන මහා සිංහල ශබ්දකෝෂයේ සම්පාදකවරයා ඔහු ය. එමෙන්ම ඔහු සිංහල ශබ්දකෝෂ සම්පාදනය සහ සිංහල අකුරු ප්‍රමිතිකරණය පිළිබඳ වියත් අදහස් ඉදිරිපත් කර ඇත්තෙකි.
ප්‍රජාතන්ත්‍රවාදයෙනුත් ඔබ්බට ගිය මහා සම්මතවාදය හෙවත් සියළු දෙනාගේම කැමැත්ත මත ක්‍රියාකරන පාලන තන්ත්‍රය ඔහුගේ දේශපාලන දර්ශනය යි. එමෙන් ම ශ්‍රී ලංකාවේ වෙසෙන සිංහල බෞද්ධයන්ගේ අයිතිවාසිකම් වෙනුවෙන් මැතිවරණවල දී සහ තව නොයෙකුත් අවස්ථාවල පෙනී සිට ඇත.
ඔහුගේ ප්‍රථම කෘතිය වන “මිරිදිය ජීවීහු” ප්‍රකාශයට පත් කරන ලද්දේ මේ කාලයේදී ය. ඉන්පසු ඔහු සංස්කෘතික දෙපාර්තමේන්තුව විසින් 1956 දී පේරාදෙණිය විශ්ව විද්‍යාලයයෙහි පිහිටු වන ලද සිංහල විශ්ව කෝෂ සම්පාදන කාර්යාලයයේ විද්‍යා අංශයේ ප්‍රධාන සම්පාදක ධූරයට පත් විය. කලක් එහි සේවය කිරීමෙන් පසු ඔහු නැවත ධර්මරාජ විද්‍යාලයයේ ම උප විදුහල්පති ධුරය ද හෙබවිය. 1965 දී වැඩ කටයුතු ආරම්භ කරන ලද ශ්‍රී ලංකා ප්‍රමිති ආයතනයේ ප්‍රථම මහා මණ්ඩලයේ ලේකම් ධුරයට යි. අනතුරුව ශ්‍රී ලංකා නීති විද්‍යාලයයට ශිෂ්‍යයකු වශයෙන් ඇතුළු වූ හෙතෙම 1973 දී අධිනීතිඥයකු වශයෙන් දිවුරුම් දුන්නේය.
තම නීතිඥ දිවියේ ඔහු විසින් කරන ලද සේවාවන් අතර 1971 කැරැල්ලට හසු වූවන් වෙනුවෙන් අපරාධ යුක්ති කොමිසම ඉදිරියෙහි සහ 1977 අගෝස්තු මස රට පුරා ඇවිළී ගිය කෝලාහලය පිළිබඳ ව හිටපු අග්‍ර විනිශ්චයකාර එම්. සී. සන්සෝනි ප්‍රමුඛ ජනාධිපති කොමිසම ඉදිරියෙහි නිස්සරණාධ්‍යාශයෙන් පෙනී සිටීම කැපී පෙනෙයි.
ඉන් අනතුරුව එළැඹුණු 1980 දශකයේ සිංහල බෞද්ධයා පත්‍රයේ ප්‍රධාන කර්තෘ, ආයුර්වේද ඖෂධ සංස්ථාවේ අධ්‍යක්ෂ සහ ගම්පහ සිද්ධායුර්වේද විද්‍යාලයයේ පාලක සභා සාමාජික යන තනතුරු දැරූ හෙතෙම 1984 – 1990 කාලය තුළ සිංහල විශ්වකෝෂයේ ප්‍රධාන කර්තෘ ලෙස ද කටයුතු කළේය.
වර්ෂ 1990 දී Legal Philosophy in Medieval Sinhale යන නිබන්ධනය කැලණිය විශ්ව විද්‍යාලයට ඉදිරිපත් කිරීමෙන් ඔහු ආචාර්ය උපාධිය ලබා ගත්තේ ය.
විවිධ විෂයන් අළලා පොත්පත් රැසක් ලියා ප්‍රකාශයට පත් කර ඇති ආචාර්ය විජේතුංගයන් හරිශ්චන්ද්‍ර විජයතුංග ලේඛනාවලිය
විද්‍යා ග්‍රන්ථ- මිරිදිය ජීවිහු (1955) ජ්‍යේෂ්ඨ රසායන විද්‍යාව (1956) පොළොවේ කථාන්තරය (1959)
පරිවර්තන ග්‍රන්ථ – බ්‍රව්නිං සහ ජෝසෆ් ලියූ ප්‍රායෝගික රසායන විද්‍යාව (1958) ඩරන්ට් ගේ කාබනික රසායනය (1963)
මාඕ සේතුං ගේ කලාව හා සාහිත්‍යය (1963) සාහිත්‍ය ග්‍රන්ථ පහන් වන දා (1961) කුමාරතුංගගේ සමාජ දර්ශනය (1962)
සිංහල ශබ්දකෝෂ සම්පාදනයට අලුත් ආකල්පයක් (1977) සිංහල අකුරු අකාරාදී කිරීම සහ ප්‍රමිත කිරීම (2003)
හෙවිසි එපා (2007) ශබ්දකෝෂ -නූතන සිංහල පාරිභාෂික ශබ්දකෝෂය (1978) පරිපාලන ශබ්දකෝෂය (1982)
ප්‍රායෝගික සිංහල ශබ්දකෝෂය, කාණ්ඩ I සහ II (1982/84) ගුණසේන මහා සිංහල ශබ්දකෝෂය (2005)
ආගමික ඉතිහාස ග්‍රන්ථ – ආගමික නිදහස හා මූලික අයිතිය (2003) ඊර්ෂ්‍යාකාරයා ගේ අණ (2006)
දේශපාලන ග්‍රන්ථ -ජාතික සටන (1960) ජනතා ජයග්‍රහණයේ අනාගතය (1963) ලෝකය රක්නා රාජ්‍යතන්ත්‍රය – මහසම්මතවාදය (1991)
ව්‍යවස්ථාවත් වැරදියි, ඒ යටතේ කළ වැඩත් වැරදියි (1991) ජාතික අනන්‍යතාවේ න්‍යායික පසුබිම (1992)
නේරු-කොතලාවල ගිවිසුම ක්‍රියාත්මක කරමු (1993 වෙනසක පෙරනිමිති (1995)
මූලික අයිතිය පෙන්වා උත්තරීතර අයිතිය පැහැර ගැනීම (1996) භීෂණයෙන් තොර සමාජයක් (1999)මාර සෙනඟ ගේ හා දේවදත්තයන්ගේ වැඩ (2003)
පෙරලියක නිර්මාතෘ – මහාචාර්ය ඇෆ්. ආර්. ජයසූරිය (2007)
නීති ග්‍රන්ථ – නීති නිඝණ්ඩුව (1998)
ඉතිහාස ග්‍රන්ථ – යක්කු සහ කුවේණිය (2008)
දේශාටන විස්තර- සුන්දර කෙන්යාව හෙවත් මාසෛයන් ගේ රට (2002)
ආසියානු, අප්‍රිකා, යුරෝපීය රටවල් රාශියක මෙන්ම ඕස්ට්‍රේලියාවේ ද සංචාරය කොට අත්දැකීම් ලබා ඇති විජයතුංග ඉන්දියාව, ජපානය, එංගලන්තය සහඕස්ට්‍රේලියාව යන රටවල විද්වතුන්ගේ මණ්ඩල ඉදිරියේ දේශන පවත්වා තිබේ.
ආචාර්ය විජේතුංගයන් මා ලේකම්ව සිටි සිංහල නීති ඥ සංගමයේ අනුශාෂක වරයෙකු ලෙස කටයුතු කළේය.අධිනිනීඥ හා නීති විදු හලේ ආචාර්යවරයෙකු හා ප්‍රවීණ පුවත්පත්කලවේදියෙකුවූ ආර් පල්ලවෙල එහි සභාපති පදවිය දැරුවේය, බොහෝ විට එම වියතුන් හා සමීපව කටයුතු කරන්නට මට අවස්ථාව සැළසුනේය. මගේ අළුත්කඩේ බෙල්මන්ට් විදියේ කාර්යාලයට ගොඩවී සතුටු සාමාචියේ යෙදී යාම එකල ඔහුගේ සිරිතක්ව පැවතුනි.මා ලන්ඩනයට පැමිණි විට 1993-4 කාලවකවානුවේදී ලන්ඩන් නුවරට පැමිණි විට විජේතුංග යුවල මගේ නිවසට පැමිණි අතර එහිදී අපෙන් වියෝව ගිය ප්‍රින්ස් ගුණසේකර මහතාද ඔහුගේ ලබැඳි මිතුරකුවූ මුනගස්වන්නට මට හැකිවිය, ( සේයාරුව බලන්න)මේ වියතු
න් සියල්ලම මේවනවිට අපහැර ගොසින්ය.
රට-දැය-සමය වෙනුවෙන් සිය දිවි කැප කළ ආචාර්ය හරිස්චන්ද්‍ර විජයතුංග මහතාණෙනි. ඔබට සුබ ගමන්
ආචාර්ය හරිශ්චන්ද්‍ර විජයතුංග මහතාගේ දේහය මා කොළ සුප්‍රීම් මල්ශාලාවේ තැන්පත් කර ඇති අතර අවසන් කටයුතු හෙට (15දා) පස්වරු 3.00ට සිදු කිරීමට නියමිතය.
රට -දැය-සමය වෙනුවෙන් සිය දිවි කැප කළ ආචාර්ය හරිස්චන්ද්‍ර විජයතුංග මහතාණෙනි ඔබට සුබ ගමන්
නිතීඥ ශාන්ත සේනාධීර – ලංකා නිවුස් යු කේ.
